Իմունոլոգիա և հյուսվածքային ճարտարագիտություն
Իմունոլոգիայի և հյուսվածքայինի ճարտարագիտության լաբորատորիան (LITE) ներկայումս հետազոտություններ է անցկացնում հյուսվածքային ճարտարագիտության / ռեգեներատիվ բժշկության և դեղամիջոցների ազդեցության ուսումնասիրման ոլորտներում: Հյուսվածքային ճարտարագիտության հիմնական նպատակն է՝ ստանալ կենդանի և կենսունակ հյուսվածքներ լաբորատոր պայմաններում, որոնք կարող են օգտագործվել բուժման նոր մոտեցումների մշակման համար: Այդ թվում՝ մշակվում են կենսաբանական իմպլանտներ, որոնք կարող են ծառայել որպես փոխպատվաստման հուսալի և մատչելի այլընտրանքներ: Դրանց կիրառումը թույլ կտա նվազեցնել փոխպատվաստուկի մերժման ռիսկերը, մեղմացնել էթիկական նկատառումները և այլն: Լաբորատորիան հատուկ ուշադրություն է դարձնում մաշկի, լյարդի, աորտայի փականի և նյարդային հյուսվածքային ինժեներիային. մասնավորապես՝ լաբորատորիայի նպատակներից են՝ ստեղծել արտաբջջային մատրիքսի այլընտրանքներ (սքաֆոլդներ) և կիրառել կենդանի բջիջներ (այդ թվում՝ ցողունային)՝ այդ սքաֆոլդների վերաբնակեցման նպատակով: LITE-ն առավելապես օգտագործում է ապաբջջայնացման մեթոդներ, քանի որ վերջիններս ունեն զգալի առավելություններ, ինչպիսիք են հյուսվածքներում առկա միկրոկառուցվածքի և կենսաակտիվ մոլեկուլների պահպանումը: Այնուամենայնիվ, որոշ դեպքերում լաբորատորիան համատեղում է այս մեթոդը հյուսվածքային ճարտարագիտության այլ մոտեցումների հետ (օրինակ՝ 3D բիոպպագրություն)՝ օգտագործելով յուրաքանչյուր մոտեցման առավելությունները, ինչը հաճախ թույլ է տալիս ստանալ առավել օպտիմալ արդյունք: Բացի այդ, նմանատիպ մեթոդների կիրառմամբ LITE-ը մշակում է փորձարարական մոդելներ, որոնք կարող են օգտագործվել դեղամիջոցների փորձարկման և այլ կիրառությունների նպատակներով: Ստացված կառուցվածքները և հյուսվածքային նմուշներն այնունհետև համակողմանիորեն գնահատվում են՝ բազմաթիվ տարբեր մեթոդների կիրառմամբ։ Վերջիններիս շարքում հատուկ կարևորություն է տրվում իմունոլոգիական գնահատմանը, որպեսզի հնարավոր լինի ստեղծել հյուսվածքների ոչ իմունոգեն փոխարինիչներ: LITE-ի հետազոտական մեկ այլ ուղղություն է՝ քաղցկեղի և այլ հիվանդությունների բուժման նպատակով նորաստեղծ դեղամիջոցների փորձարարական գնահատումը: Համագործակցելով հայաստանյան և միջազգային գիտական խմբերի հետ՝ LITE-ը մասնակցում է դեղամիջոցների մշակուման հետազոտություններում՝ արհեստական բանականությմբ նախապես ընտրված պոտենցիալ հակաքաղցկեղային մոլեկուլների in vitro գնահատման միջոցով: Վերջինս հնարավոր է դառնում, քանի որ լաբորատորիան մեծ փորձ ունի բջիջների անջատման, բնութագրման և միացությունների փորձարկման ոլորտում։ Լաբորատորիան նաև պարբերաբար անցկացնում է հյուսվածային ճարտարագիտության գործնական դասընթացներ՝ խթանելու երիտասարդ գիտնականների հետաքրքրությունն այս ոլորտում: Լաբորատորիայի աշխատակիցները պարբերաբար անցնում են նաև դասընթացներ և վերապատրաստումներ տարբեր առաջատար հետազոտական կենտրոններում՝ ինչպես Հայաստանում, այնպես էլ արտերկրում։ Ինչպես նաև, հետազոտական արդյունքները ներկայացվում են տարբեր տեղական և միջազգային գիտաժողովներում և գիտական պարբերականներում։